Ir fröut iuch, junge und alde.
der meie mit gewalde
Den winder hât verdrungen.
die bluomen sint entsprungen.
	wie schône nahtegal
	ûf dem rîse
	in manger wîse
	singent wünneclîchen schal.

'Der walt ist wol geloubet.
mîn muoter niht geloubet,
Der mir mit einem seile',
sprach ein maget geile,
	'Bunde mînen fuoz,
	mit den kinden
	zuo der linden
	ûf den anger ich doch muoz.'

Daz gehôrte ir muoter:
'jâ swinge ich dir daz fuoter
Mit stecken umbe den rügge.
vil kleine grasemügge,
	Wâ wilt du hüpfen hin
	ab dem neste?
	sitze und beste
	mir den ermel wider in.'

'Muoter, mit dem stecken
sol man die runzen recken
Den alden als eim sumber.
noch hiuwer sît ir tumber
	Dann ir von sprunge vart.
	ir sît tôt
	vil kleiner nôt,
	ist iu der ermel abe gezart.'

Ûf spranc sî vil snelle.
'der tievel ûz dir belle!
Ich wil mich dîn verzîhen.
du wilt vil übel gedihen.'
	'Muoter, ich lebe iedoch,
	swie iu troume.
	bî dem soume
	durch den ermel gât daz loch.'