Hêr Heinrich von Môrungen

Ich hôrt ûf der heide
lûte stimme und sûzin sanc.
Dâ von wart ich beide
frouden rîch und trûrins kranc.
	Nâch der mîn gedanc
	sêre ranc
	unde swanc,
		die vant ich zu tanze dâ sie sanc.
		âne leide
		ich dô spranc.

Ich vant sie virborgin
eine, ir wengil trêne naz,
Dô sie an dem morgin
mînis tôdis sich virmaz.
der vil liebin haz
tût mir baz
danne daz
dô ich vor ir knuwede dâ sie saz
und ir sorgin
gar virgaz.

Ich vants' an der zinne
eine, ich was zu zir gesant.
Dâ moht ichs ir minne
wol mit fûge hân gephant.
Dô wând ich di lant
hân virbrant
sâ zuhant,
wan daz mich ir sûzin minne bant
an den sinne.
hât irblant.