Niemen kan mit gerten
kindes zuht beherten:
den man zêren bringen mac,
dem ist ein wort als ein slac.
dem ist ein wort als ein slac,
den man zêren bringen mac:
kindes zuht beherten
niemen kan mit gerten.

Hüetet iuwerr zungen:
daz zimt wol den jungen.
stôz den rigel für die tür,
lâ kein boese wort dar für.
lâ kein boese wort dar für
stôz den rigel für die tür
daz zimt wol den jungen
Hüetet iuwerr zungen

Hüetet iuwerr ougen
offenbâr und tougen.
lât sie guote site spehen
und die boesen übersehen.
und die boesen übersehen
lât sie, guote site spehen
offenbâr und tougen
hüetet iuwerr ougen

hüetet iuwer ôren,
oder ir sit tôren.
lât ir boesiu wort dar in,
daz gunêret iu den sin.
daz gunêret iu den sin,
lât ir boesiu wort dar in,
oder ir sit tôren.
hüetet iuwer ôren.

Hüetet wol der drîer,
leider alze frîer.
zungen ougen ôren sint
dicke schalchaft, zêren blint.
dicke schalchaft, zêren blint
zungen ougen ôren sint.
leider alze frîer
hüetet wol der drîer.